RV – “Orasaun umilde obtain mizerikórdia”. Ne’e mak tema katekeze husi Papa Francisco iha kuarta, 1 Juñu 2016, iha Vaticano. Santu Padre reflete kona-ba ai-kanoik farizeu no publikanu (Lc 18,9-14) atu salienta valór umildade eh haraik-an nian.

Download

Papa Francisco esplika katak iha pasajen evanjélika ne’e hatudu ema ida harohan ba an rasik, iha orasaun egoista no mamuk, no ema seluk fali iha haraik an, husu laran-sadia tanba nia hatene nia ema maksalak. “Tanba ne’e, la to’o husu ba an rasik ita harohan dala hira, ita mós tenke kuestiona kona-ba oinsá ita harohan, eh di’ak liután, oinsá ita-nia fuan”, Amu-Papa haktuir.

Husi afirmasaun ida-ne’e, Papa Francisco propoin lia-husu ruma ba sarani sira: “Ha’u husu: “posivel harohan ho arrogánsia? Lae! Posivel harohan ho ipokrizia? Lae! Ota tenke harohan iha Maromak nia oin nu’udar ita nia an rasik!”.

Elementu importante seluk ba orasaun, Santu Padre observa, mak pás interior. Buat ne’e, buat ruma difisil atu alkansa iha mundu ida ne’ebé halai lalais, “frenezia” ritmu moris lorloron nian, tuir sensasaun sira, konfuzu. Tanba ne’e “nesesáriu aprende hetan filafali dalan ba ita-nia fuan, rekupera valór intimidade no silénsiu nian, basá iha ne’ebá mak Maromak hasoru ita no ko’alia mai ita”, Amu-Papa destaka.

Papa Francisco subliña tan katak husi fatin íntimu no sagradu enkontru ho Maromak mak posivel bá hasoru ema seluk.  Farizeu bá iha temple seguru ho an rasik maibé nia la komprende katak nia haluha tiha dalan ba nia fuan. Publikanu fali, aprezenta an iha temple ho umildade no arrependimentu no harohan hodi husu Maromak nia laran-sadia. “La iha buat seluk tan! Orasaun ida furak tebes! Mai ita dehan dala tolu, hamutuk: “Oh Maromak, sadia ha’u, ema maksalak”.

Ema farizeu ne’e korruptu, Amu-Papa fó hanoin hikas, nia hatene de’it gaba an iha nia an rasik.. “Foti-an kompromete hahalok di’ak hotu, hamamuk orasaun, hadook ita husi Maromak no ema seluk. Se orasaun ema foti-an nian la to’o iha Maromak nia fuan, ema mizerável nia umildade loke  Maromak nia fuan. Maromak iha frakeza ida ba ema haraik-an sira: iha ema haraik-an nia oin, Maromak loke nia fuan totalmente”.