Fuiloro – Iha loron 30 de Setembru 2016, nudar loron ksolok ba ami nia komunidade, ami hotu  ho ksolok no entusiasmu hein estatua Maria Auxiliadora nian, ne’ebé, inspetoria entrega ba ami. Maske  ho situasaun ne’ebé okupadu, ema ida-idak preukupa ho ninia serbisu, maibe it abele haree no sente kedas oinsa irman ida-idak nia domin ba ita inan Auxilidora, nune’e hodi husik sira nia preukupasaun hotu, hodi dedika tempu atu hein Maria Auxiliadora nia estatua.

Kuaze tuku 10.30 otl, Me. Provincial akompaña estatua Maria Auxiliadora  to’o iha komunidade, beata Morano Fuiluro. Irman no professora sira hotu ho ksolok hein  tiha ona, Nain feto nia ilas, maske iha biban ne’eba menina sira la marka sira nia prezensa, maibe ho fuan kontente ami simu  Ita inan nia prezensa.

Nu’udar ami nia benvinda, ami hato’o liu husi ami nia knananuk “ Benvenuta Madre nostra Ausiliatrice”, depois de remata serimonia simu nian, irman  no professora sira, hamutuk ho Me. Alma akompaña kedas estatua Maria Auxiliadora  hodi hodi tama ba kapela, iha ne’eba ami hahu ho orasaun, nudar momentu maksimuk nian no momentu agradese nian, hodi hananu knananuk  “ Maria Mãe da Esperansa”. Ho tempu hanesan entrega fila fali Auxiliadora kiik ba Me. Provincial hodi lori fali ba komunidade seluk. Maske sente todan atu husik Auxiliadora kiik, maibe hanesan liafuan ne’ebé ema dehan bebeik,” se hakarak atu manan ida seluk, entaun tenke lakon/ husik ida” nune’e ho fuan kmaan no livre ami entrega auxiliadora kiik  ba Me. Provinsial. Ami nia serimonia la remata deit iha ne’e, tanba menina sira nia prezensa laiha, hanesan buat ruma ne’ebé la kompletu, entaun iha lorokraik, grupo liturjia ba fulan setembru nian,  Me. Sebastiana no Sr. Noemia, sira organiza tersu especial. Molok atu halao Rosario, irman ida-idak ni menina sira oferese aifunan ba estatua Maria Auxiliadora no ho tempu hanesan irman, Fatima ho nia domin no hamnasa midar hodi tara tais ba Nain Feto, no ikus nudar ksolok orasaun nian, menina sira hato’o sira nia dansa “ Maria Vogliamo a te”. To’o iha ne’e remata ona serimonia simu nian.

Finalmente, sentimentu ne’ebé ami iha kona ba Maria Inan tulun nain nia prezensa, mak nudar bensaun no grasa ida ba ami no foinsa’e sira, tan iha Maria mak ami tau laran metin no ami nia konfiansa. Maria mak nu’udar mestra esperansa no ksolok nian ba ita, hanesan iha evanjellu saun Lukas 1:39, ne’ebé haktuir wainhira Maria simu tiha mensajen husi anju, Maria nakonu ho ksolok no iha esperansa boot  ba hasoru kedas nia prima Sta. Isabel, atu haree nia kondisaun no hodi hananu ninia ksolok magnifikat nian. Nune’e ho Maria nia ksolok no esperansa ida ne’e, nudar naroman ida ne’ebé tulun ami atu persevera nafatin ho fidelidade iha ami nia vokasaun no misaun.

Ikus lahaluha mos, ami nia obrigada wain ba Me. Provinsial no konseleira sira hotu ne’ebé ho laran luak entrega Estatua Maria Auxiliadora, ba ami nia komunidade.

(Maria  Sarmento)