Surat Apostólika foun “Miisericordia et misera” subliña importánsia atu fó kontinuidade ba dinámika Jubileu nian

RV – Papa Francisco ohin, 21 Novembru 2016, publika surat apostólkca foun, loron ida depoizde finál ‘Ano Santo extraordinário’, iha ne’ebé nia defende katak Igreja Katólika nunka bele “tau kondisaun sira” ba Maromak nia mizerikórdia.

 “La iha ema maksalak ida ne’ebé arrepende tau nia an iha Maromak nia mizerikórdia nia oin no la simu ninia perdaun nia hakohak. Ba motivu ida-ne’e mak la iha ita ida ne’ebé bele tau kondisaun sira ba mizerikórdia; nia sai nafatin hahalok ida gratuidade Aman lalehan nian, domin inkondisionál no la meresidu”, Papa  Francisco hakerek, iha dokumentu ida ho títulu ‘Misericordia et misera’.

Dokumentu alerta ba nesesidade atu respeita “liberdade nakonu domin nian” ne’ebé ho nia Maromak tama iha ema ida-idak nia moris no subliña katak “maski iha kazu kompleksu liu karik bá”, iha-ne’ebé iha tentasaun atu halo justisa  ne’ebé mai husi “norma sira” mak ukun, ita presiza fiar “iha kbiit ne’ebé suli husi grasa divina”.

“Maromak la tau barreira ida ba ema hotu ne’ebé buka Nia ho fuan arrependidu, maibé bá hasoru hotu-hotu hanesan Aman ida”, Amu-Papa insiste.

“Misericordia et misera”, títulu surat apostólika nian, mak liafuan rua ne’ebé Santu Agostinho utiliza atu haktuir enkontru entre Jezús no feto adúltera Evanjellu sira relata, hodi fó hanoin katak feto ne’e, tuir lei tempu ne’ebá nian, ema bele kondena hodi tuda fatuk to’o mate.

Epizódiu ida-ne’e Amu-Papa hili nu’udar imajen Jubileu Mizerikórdia nian, ne’ebé katóliku sira mundu tomak nian moris husi Dezembru 2015 to’o Novembru tinan ne’e nian,  hakarak bá kontra vizaun ida ne’ebé tau iha sentru “lei no justisa legál”.

“La iha lei eh ukun-fuan ne’ebé bele impede Maromak atu hakohak hikas fali oan ne’ebé fila ba Nia hodi rekoñese katak nia sala, maibé deside atu hahú fila fali. Metin de’it iha lei hanesan halo fiar no Maromak nia mizerikórdia la folin”, Amu-Papa hateten.

Papa Francisco konsidera katak tinan santu ne’e mak “tempu ida riku iha mizerikórdia”, dimensaun ida ne’ebé tenke kontinua atu “selebra no moris”.

“Mizerikórdia la bele redús de’it ba parénteze ida iha Igreja nia moris, maibé konstitui ninia ezisténsia rasik, halo Evanejellu sai vizivel no bele kona. Buat hotu revela iha mizerikórdia; buat hotu halibur iha Aman mizerikordiozu nia domin”, nia esplika.

Dokumentu subliña importánsia perdaun nian no aprezenta mizerikórdia nu’udar “asaun konkreta ida” ne’ebé, iha domin no hahalok perdua nian, konsege muda vida sira.

“Oinsá triste tebes bainhira ita taka iha an rasik, lahó kbiit atu perdua! Resentimentu, hirus, vingansa mak manán, hodi halo moris lahaksolok no hodi estraga kompromisu ksolok nian ba mizerikórdia, Amu-Papa kontinua.

Depoizde “tinan intensu” ida, Amu-Papa husu no subliña nesesidade atu iha futuru, kontinua selebra mizerikórdia, hahú husi Liturjia no orasaun, iha “diálogu loloos ida entre Maromak ho ninia povu”.

“Jubileu remata no taka Odamatan Santa. Maibé odamatan mizerikórdia ita-nia fuan nian nakloke luan nafatin”, ita bele lee iha nia surat.

Surat apostólika ‘Misericordia et misera’ asina iha domingu Kristu Liurai nian, iha Prasa S. Pedro, depoizde finál Missa ne’ebé taka Jubileu Mizerikórdia nian, iha Tina Santu da-29 istória Igreja Katólika nian.