Iha loron ikus sira molok Natál, mensajen fundamentál Maromak nia Liafuan nian mak definisaun Jezús nia misaun nian: propoin projetu ida salvasaun no libertasaun nian ne’ebé lori ema sira ba deskoberta ksolok loos nian.

Evanjellu sujere katak Maromak nia projetu ne’e iha ema ida nia oin: Jezús Nazaré nian ne’ebé mai hasoru ema sira atu aprezenta ba dadur sira moris-atan nian, proposta moris no liberdade nian. Nia propoin mundu foun ida, iha ne’ebé ema moris iha ninin/marjinalizadu sira no sira ne’ebé iha opresaun laran ka ema hanehan hetan fatin no sira ne’ebé terus hetan dignidade no ksolok.  Ne’e anúnsiu ida ksolok no salvasaun nian, basá halo ema hotu ne’ebé rekoñese iha Jezús proposta libertadora husi Maromak, haksolok. Proposta ne’e to’o, dala barak, liuhusi limite no frajilidade “instrumentu” umanu sira Maromak nian; maibé nafatin proposta ida ne’ebé iha Maromak nia marka no kbiit.

Primeira leitura sujere katak mundu foun ne’ebé Jezús, dexendente David nian, mai propoin mak don ida husi Maromak nia domin. Jezús nia naran mak “dame”. Nia mai aprezenta proposta ida kona-ba “reinu” dame no domin nian, la harii ho kbiit kro’at/kilat nian, maibé harii no hetan simun iha ema sira nia fuan.

Segunda leitura sujere katak misaun libertadora Jezús nian iha finalidade atu estabelese relasaun ida komuñaun no prosimidade/babesik entre Maromak no ema sira. Ba ema sira mak konvite atu simu proposta ne’e ho disponibilidade no obediénsia – tuir Jezús Krsitu nia ezemplu – iha “sin” totál ida ba Maromak nia projetu.

Download