Dili – Loron 26 de Abril ne’ebe selebra festa Agradesimento Mundial ba Madre Jeral  monu iha loron kuarta, nune’e komunidade selebra iha loron Domingo ohin dia 23, atu nune’e komunidade Edukativa bele mai partisipa hotu. Misa hahu iha tuku 15:30 ne’ebe prezide husi Pe João Boavida, SDB partisipa husi komunidade edukativa tomak: Oratorianos, animadores, antiga/o alunas, familia, no mos oratorianos husi DEJUKDIL.

Ksolok tebes atu envolve ita nia foin-sa’e sira, familias sira, kolaboradores no antiga/o oratoriano sira iha ita nia festa Agradesimentu Madre Jeral nian. Momentu diak atu kunese se mak Madre Jeral no knaar no responsabilidade iha Instituto.  Iha omilia Pe sublinha oituan Liturgia Domingo ohin nian, maibe liu-liu nia husu ba partisipante hotu reza ba Madre Jeral tanba bele simu knaar ida ne’e hodi tau matan ba Madre sira iha mundo tomak, no komunidade Edukativa ne’ebe halo parte iha Misaun Madre sira nian. Pe hatudu Me jeral nia foto no dehan: “ita hare ema isin kiik maibe fuan boot, hodi bele hakuak irma sira houtu iha mundo tomak, liu-liu lori Irman sira  hotu nia krus. Tan knaar boot ida ne’e ita reza ba nia, no ita reza tanba domin boot ba Irman no foin-sa’e sira, nia buka atu fo orientasaun no hanoin sira nune’e Madre sira bele kontinua serbi Maromak liu husi foin-sae sira”.

Depoizde Misa iha divertimentus numeru sira ne’ebe prepara husi labarik kikuan sira iha oratoriano, sira mos aproveita kumprimenta  Boas Festa Pascoa ba Madre sira, animadores no familia sira, hafoin iha merenda hamutuk mak ida-idak fila ba uma. Ema ne’ebe partesipa iha Misa Festa Agradesimentu hamutuk nain 300 la konta ami sira ne’ebe hela iha komunidade laran.

BUONA FESTA MADRE JERAL NO AGRADESE WAIN.

(FMA Dili-Balide)