Laga – Loron 28/05/2017, Infánsia misionária Venilale no Laga hasoru malu iha Komunidade Laura Vicuña-Laga. Objetivu mak tulun sira atu komprende katak infánsia misionária nia haburas hodi fó sasin evanjellu nian ba malu. Tempu hanesan Hatudu domin no laran midar ba Maria Missionária no apresia liu Me. Gianna Spaggiari nia sasin kona-ba fó an no serbí. Nune’e Hamutuk, hametin amizade ho espíritu misionária/o nian. Sira nia programa mak: Formasaun, Tersu Misionária, jogus amizade no merenda hamutuk.

Iha formasaun, Madre Gianna lori sira atu hakle’an objetivu Infánsia misionária nian lolos. Nune’e nia dehan: “Infánsia misionária tenke hanoin ema seluk iha mundu hodi halo: Orasaun, sakrifisiu no solidariedade. Nu’udar misionário/a aprende atu labarik evanjeliza labarik no mós haree ema seluk iha dalan (matan delek, aleizadu, drogadu no ferik katuas sira) hodi fó buat ne´ebé sira presiza. Sé imi kostume ho solidariedade, imi sei harii sosiedade di’ak, sarani di´ak no sidadaun di´ak iha nasaun Timor. la bele sai egoista”.

Madre Gianna haktuir ba sira katak infánsia misonária iha Timor madre mak hahu no nia sente kontenti tanba to´o ohin loron fini ne’ebé nia kuda kontínua buras no nia fó korajen ba sira aten brani atu haklaken Evanjellu Jezús nian no Na’in Feto ba ema seluk. Liu-liu iha família no aprende ba dere ema seluk nia odamatan no konvida sira ba misa“.

Imi buka hamanas imi nia fuan ho Jezús nia domin imi sei ba oin no empeñu ne’ebé ha’u husu ba imi atu halo mak ne’e moris iha mandamentu misionária nian:

1. Labarik misionária haree ba ema hotu-hotu ho matan maun no bin alin nian
2. Labarik misionária koñese Jezús, hadomi hanesan Jezús, la moe atu koalia kona-ba Jezús
3. Labarik misionária reza loroloron ba Aman iha lalehan ba labarik hotu iha mundu tomak no hakarak atu ema hotu bele koñese Jezús no Nia Inan Maria ne’ebé ita hotu nia inan
4. Labarik misionária nafatin hahi no agradese Maromak
5. Labarik misionária haksolok hodi fahe buat ne´ebé nia iha, no hetan ksolok wainhira haree ema seluk mós hatene fahe
6. Labarik misionária haksolok hodi sai solidaria ho nia maun alin no feton sira
7. Labarik misionária hatene katak ida ne’ebé importante no folin liu laos di’ak materiais sira
8. Labarik misionária hatene laran luak, maske sei kusta/ susar tebes
9. Labarik misionária buka solusaun nafatin hodi hatan lalais
10. Labarik misionária nafatin hanoin “ita hotu“ Maromak deit mak ita nia riku-soin

Ami agradese ba Maromak ba esperiénsia furak ida ne’e ne’ebé sei la repete. Ami agradese mós ba Komunidade Laga nia espíritu maksimuk no ksolok nian. Na’in fó bensaun!

(Agata Freitas)