Venilale – Komunidade Madre Mazzarello hamutuk ho staff sira iha klínika Maria Auxiliadora Venilale, hato’o agradese wain ba dentista sira husi Australia, ne’ebé ho laran luak tebes mai atu fó tulun ba hirak ne’ebé iha problema ho saude nehan nian. Durante loron tolu nia laran, husi loron 10-12 Jullu, dentista sira Brian James Phillips ho nia kaben Mary Dawn Phillips,  Terence Wai Keung Yuen, Peter Ku-Fong Li no enfermeiru Domingos da Costa atende pasiente hamutuk ema 270. Ema sira ne’e mai husi eskola ka estudante sira no mós adultu sira, inklui relijioza/u sira.

Dentista sira haksolok tebes atu halo servisu ida ne’e tanba husi sira na’in 5 ne’e, na’in 4 ho idade liu tinan 65. Maibé sira nia entusiazmu no sakrifisiu, halo sira foinsa’e nafatin, no iha hakarak atu ajuda ita Timor oan sira. Komunidade no pasiente hirak ne’e promete de’it atu reza ba sira nune’e Maromak kontinua tau matan ba sira no ba sira nia servisu karidade ne’ebé sira halo mai ita iha ita-nia rain.

(Yasinta Hoar Bria)