Fuiloro – Iha tersa lorokraik, 18 Jullu 2017, iha komunidade Madre Morano Fuiluro, hala’o orasaun Taize ne’ebe animadores no Madre sira Fuiloro nian esperiensia orasaun Taize iha Baucau ho madre Alma. Transmisaun orasaun ida  ne’e  halo hamutuk ho menina koleju sira, animadores sira, madre sira komunidade no professora sira. Partisipante sira hamutuk 130 pessoas, atividade ida ne’e ami hala’o kuaze oras ida (1) nia laran. Hanesan buat ne’ebé ami esperiensia tiha ona iha Baucau, molok atu hahu orasaun, iha introdusaun ruma kona ba istoria Taize nian, ne’ebé hato’o husi irman Noemia, FMA no ho tempu hanesan animadores balun fahe mos sira nia esperiensia kona ba orasaun Taize ne’ebé sira tuir iha Baucau. Tuir mai hau husik ba imi atu lee intervista menina sira balun:

• Maria Brieza Hornay ( ETA III). “ ba ha’u pessoalmente foin primeira vez, tuir orasaun Taize ne’e. Maske ha’u hare tiha ona iha fatin balun ne’ebé sarani sira reza, maibé ha’u ladauk hatene orasaun ne’e hanaran saida. Bainhira reza hamutuk ho madre no kolega sira iha kolejiu Morano ha’u foin deskobre katak orasaun ne’e hanaran Taize, no hatene mos katak Taize ne’e la’os orasaun ida nia naran maibé rai ida nia naran. Bainhira reza tiha halo ha’u iha hakarak boot atu reza nafatin. Iha parte silensiu nian ne’ebé ami reflete hodi halo komparasaun ba ami nia moris. Iha ha’u nia momentu silensiu nian, ha’u sente laran susar ho ha’u nia hahalok hirak ne’ebé ha’u halo hodi kompara fali ba leitura ne’ebé ha’u rona, katak ha’u hanesan fini ne’ebé monu iha fatuk laran ,mak ida ne’ebé rona liafuan hodi simu kedas ho ksolok, maibé tan abut la metin , nia mate lalais, hetan tiha susar tamba liafuan, nia monu kedas. Iha parte seluk  ne’ebé ha’u gosta mak, iha orasaun intersesaun nian, ema ida-idak hasae orasaun hodi reza ba familia, kolega, ba ema ne’ebé ita koñese no la koñese, ba ha’u parte ne’e furak loos tamba ita la’os reza deit ita nia –an no ema ne’ebé ita koñese deit, maibé ba intensaun hotu”. Obrigada barak, ba inisiativa atu halo atividade ida ne’e.
• Marianita Nascimento Flora (ETA II):” Ha’u sente orgullu tebes wainhira tuir Taize ne’e, tamba iha ha’u nia moris tomak primeira vez ha’u tuir Taize ho ha’u nia maluk sira. Fofoun ha’u rona husi madre sira atu hili ha’u nia maluk balun atu ba tuir Taize iha Baucau, ha’u hanesan dúvida oituan ho liafuan ne’e, no buat ne’ebé mosu iha ha’u nia hanoin mak ba ha’u Taize hanesan orasaun ida, maibé bainhira ha’u tuir rasik, hodi rona Taize ne’e nia istoria, ha’u foin hatene katak Taizé ne’e la’os orasaun maibé fatin ida nia naran, ne’ebé ema husi nasaun oi-oin no relijiaun oi-oin, halibur hamutuk iha ne’ebá atu halo sira nia orasaun. Iha orasaun nia laran parte ne’ebé ha’u gosta liu mak iha momentu ne’ebé ami ida-idak halo reflesaun kona ba salmu sira. Tamba iha momentu ne’e hanesan oportunidade diak ida ba ha’u atu bele reflete didiak Maromak nia liafuan, hanesan iha salmu ne’ebé dehan:

“Hahi no hanai ho haksolok ba Na’i. La’os atu husu deit maibé hatene mos atu agradese. No hahi ba Maromak, ba Ninia diak hotu.” Wainhira ha’u lee liafuan sira ne’e hodi kompara ho ha’u nia moris dalabarak ha’u mos ema ne’ebé hatene husu-husu deit maibe la hatene agradese no hahi Maromak ba buat diak ne’ebé ha’u simu iha ha’u nia moris loro-loron nian. Nune’e salmu ida ne’e sai duni mata dalan ba ha’u nia dalan moris loro-loron nian. Obrigada ida ne’e mak ha’u nia esperiensia.

• Mardiana Apariçio Maria Barros ( Kursus 2017): “ Mai ha’u  esperiensia orasaun ida ne’e hanesan buat foun maibé ha’u enjoy,  parte ida mak iha momentu silensiu nian, liu-liu iha klima ne’ebé hakmatek, ha’u bele halo dialogu ho Maromak, hodi hato’o ha’u nia problemas, frakeza no ha’u nia esperiensia moris nain, ne’ebé dalaruma  halo ha’u ladun kontente, iha momentu ne’e buat ne’ebé ha’u sente mak Maromak nia domin ne’ebé hakbiit ha’u atu la’o no luta hasoru tristeza ne’ebé kona ha’u. Aleinde ne’e ha’u bele hato’o ha’u nia limitasoens no problemas hotu liu husi orasaun intersesaun. Obrigada wain ida ne’e mak ha’u nia esperiensia.
• Erna Elesita Silva ( Voluntariada):” mai ha’u sente kontente tamba bele halo esperiensia ne’e ho jovem barak, parte ida ne’ebé interesante liu mai ha’u mak lee evanjellu saun Mateus nian, ne’ebé koalia kona ba “fini” hafoin halo reflesaun, iha parte ida ne’e mak tama klean liu ba ami ida-idak hodi reflete ba ami nia moris hodi sai fali fini ne’ebé kari iha rai bokur hodi fo fuan diak no folin barak. Obrigada  ba esperiensia furak.

Hodi ami hotu nia naran, hakarak agradese ba Madre Alma tanba fahe ho ami orasaun Taize no orasaun ida ne’e bele tulun ami atu halao fali ho foinsa’e sira seluk iha ami nia ambiente.

(Maria Sarmento Guterres)